عتاب مصراوي

طب أشتريكى بأيه وأرخص ما فيكى دمى ؟
هو انتى مرات أبويا ولا انتي صحيح أمي
ولا أنتى بتبعدينى ولا أنت بتضمى
ولا انتى بتفرحينى ولا بتزودى همى
وبشرب من نيلك وبتشربى من دمى
ازرع أرضك فرح وبتزودى غــــــــمى
أتقتل في حضنك أخويا وأعتقل عمى
أمانه عليكى يا شيخة تحنى واهتمى
انا مهما كان إبنك فاعقلى واتلمى
ولو شفت العذاب ألوان هتفضلى أمى
انا بس خايف عليكى يقطعوكى وتترمى
يربطوكى فى ساقيه وتشتغلى وتتغمى
خيرك يبقى ليهم ويطلع عين أمى
فقوليلى إنتى مين يلى ما تتسمى
ولو بردوا مش حبانى هتفضلى أمى
طب أشتريكى بأيه ودمى أغلى ما عندى
وإنتى كاتمه صوتى ومكبلة يدى
ده انا يا ماصبرت عليكى وقول أزمة وتعدى
عشت مستنى سنين لا باخد ولا بدى
طب أديكى أيه ورزقى على قدى
اسهر طوال الليل دماغى تجيب وتودى
بسألك بكرة هعيش وعمرك ما هتردى
لأن عمرى أكيد لا فى يدك ولا بيدى
و لما هتفت أغيرك ما حدا سمع ردى

كان نفسى ازرع فيكى ورد فى البساتين
صبوا على رصاصك فى الحوارى وفى الميادين
ما خفش من ربنا ولا هموا أصول ولا دين
وحلل لنفسه دمى بشيوخ السلاطين
واحنا فدا نيلك لو شهدا بالملايين
نتظاهر فى شوارعك ايام شهور وسنين
ومهما عمل فينا فأحنا كمان صامدين
ده إحنا أحفاد قطز وأحفاد صلاح الدين
صابرين يا مصر وربك بشر الصابـــــــرين